يومياتي بالعاصمة لندن

أخوانى واحبابى أحب اقولكم مبدئيا إنى سافرت الى لندن منذ 4 ايام مع جروب من الطلاب لتعلم اللغة الانجليزية وطبعا سيادتى وحضرتى المشرف , فإسمحولى أضيع من وقتكم الثمين فى حكاوى و رغى عن يومياتى فى المملكة البريطانية:-

أولا مبدأ الحمد لله إنى مصرى
مبدئيا أنا لما سافرت من ست سنوات الامارات ، كان سقف التوقعات بتاعتى عادى عن الامارات ....إيه يعنى دبى أو أبوظبى ... دى مصر هى أم الدنيا وطبعا كنت شارب من نيلها وحافظ الاغانى الوطنية المصرية وكنت مقتنع إن مصر دى أحسن دولة فى العالم لدرجة إنى كنت أحيانا مع نفسى وأنا صغير ، أقول الحمد لله إن الواحد طلع مصرى مش اى حاجة تانية فارغة ..... ده إحنا اسياد العالم .... وعبرت قواتنا الجوية قناة السويس وهزمنا اكبر قوة فى العالم وإن أمريكا مش بتخاف إلا من مصر ........... والأغانى الوطنية كانت عاملة شغل فى دماغى .....

المهم سافرت أبو ظبى وقلت يا خرابى ده بلدنا دى فى الحضيض .......... و لما لقيت إن لازم يكون لى كفيل إماراتى ....... قلت ليه يا ربى ما اطلعتش انا إماراتى ......... و من وقتها سقط القناع من على وش مصر أم الدنيا ....

عرفت إننا ضايعين و فى الكازوزة ....... ولقيت شهادتى مشكوك فيها لأنها مصرية والتعليم بتاعنا فعلا فى الضياع ....... عكس ما كنت فاهم خالص ........ كنت فاكر هيحتفلوا إن جالهم واحد مصرى إلى الامارات .... زى باقى العباقرة المصريين اللى بيسافروا بره و بيشرفونا ......... بصراحة كنت ساذج جدا لدرجة إنى متغاظ من نفسى دلوقتى وبالعكس لا قيت المصرى مشهور بره إن عايز يعمل نفسه فاهم و فتك فى كل حاجة وعارفين فى الخليج إن المصرى لو سألته على أى حاجة هيفتى ويقول رأيه حتى لو مش فاهم ....

المهم قلت أكيد فى حكمة إن ربنا خلقنى مصرى .......... فقلت الحمد لله الذى لا يحمد على مكروه سواه محدش عارف الخير فين مش يمكن كنت هطلع على اخر لحظة صومالى ولا سودانى وربنا سترها ........

وعرفت المغزى الحقيقى لكلمة مصر أم الدنيا وده فهم جديد و أعتقد أنه الفهم الصحيح اللى كان يقصده اللى قال الكلمة دى ........
فى مصر زمان الأم هى دايما بتعانى وتتعب و تشيل العيال و تخبز وتطبخ و تغسل و تربى و يكون عندها سبع عيال وأبوهم .............. العيال كتير وهى مش ملاحقة تأكلهم ومش لاحقة تغسل لهم ومش لاحقة توفر لهم أى حاجة وصحتها بقت تعبانه وجوزها بقى زهقان منها لانها مش واخدة بالها من نفسها عشانه و العيال علطول مش نضاف ........... وتلاقى الام تعبانه ومحدش حاسس بيها والعيال مش بيسمعوا كلامها و جوزها بعد شوية يطلقها ........... فحياة الأم صعبة أوى صراحة

فهمتوا ليه مصر إسمها أم الدنيا مش أبو الدنيا أو خالت الدنيا أو عمة الدنيا ........... لأن الباقين أكيد مستريحين

ده الفهم الصحيح اللى كان بيقصده اللى قال الكلمة وإحنا مكناش واخدين بالنا بس الحمد لله وصلت فكرته.

نرجع لموضوع بريطانيا بقى
تلاقيكم بتقولوا إنى برغى كتير .... المهم مش مشكلة ..... هرجع يا عم الظريف الخفيف

المهم و أنا مسافر بريطانيا المرة دى كان سقف التوقعات عالى بقى جدا ........... اللى حصل العكس ... لأن بريطانيا مش حلوة و كمان لندن عادية جدا و المبانى قديمة كلها وكمان كل المبانى نفس اللون والريحة ................... وعلى فكرة محبيتهاش و مرشحهاش لحد إنه يحاول او يفكر يعيش فيها كدولة أوربيه لاسباب كتير هحكيهالكوا إن شاء الله تعالى

المهم أنا فى لندن دلوقتى ومعايا جروب من القطريين والمصريين و أنا المشرف بتاعهم ولو ربنا يسرلى وعقلى قعد فى راسى و متجنتش منهم لحد بكرة ...... هبدأ أحكيلكم قصص غريبة بتحصل يوميا مع العيال دول ومع الناس فى لندن

إنتظرونى كل يوم

دى صورى يا رجالة فى العاصمة البريطانية عشان متشكوش إنى سهران فى سوهاج بكتب خواطرى وعملت الصور بالفوتوشوب و بعيش عليكم يا رجالة

قصيدة رثاء
أهديها لأغلى الناس ؟

يا كوكباً ما كان أقصر عمره

وكذاك عمر كواكب الأسحار

وهلال أيام مضى لم يـستدر

بدراً ولم يمهل إلى الأسحار
عجل الخسوف إليه قبل أوانه

فمحاه قبل مظنة الإبدار

واستُـل مـــــن أترابه ولداته

كالمقلة اسـتُلت من الأشفار

فكأن قلبي قبـــــــــره وكأنه

في طيّـه سر من ألأسرار

إن الكواكب في علو مكانها

لترى صغاراً وهي غير صغار

ولد المعزى بعضه فإذا مضى

بعض الفتى فالكل في الآثار

أبكيه ثم أقول معتـــــذراً له

وُفّـقتَ حين تركتَ ألأم دار

جاورتُ أعدائي وجاور ربه

شتان بين جواره وجواري
حكم المنية في البرية جاري

ما هذه الدنيا بدار قرار

بينما يرى الإنسان فيها مخبراً

حتى يُرى خبراً من الأخبار

طُبعت على كدر وأنت تريدها

صفواً من الأنكاد والأكدار!!

و طلب الأيام ضـــد طباعها

كأنه طلبٌ للماء من جذوة نار

وإذا رجوت المستحيل فإنما

تبني الرجاء على شفير هار

فالعيش نوم والمنية يقظـــة

والمرء بينهما خيال سار

فاقضوا مآربكم عجالاً إنما

أعماركم سفر من الأسفار

كانت هذه قصيدة أبي الحسين التهامي المتوفى في القرن الخامس يرثي فيها ابنه الذي مات صغيراً فرثاه بالقصيدة السابقة ........

روحو عن القلب ربع ساعة

مباراة كأس العالم فيفا 2010
بجنوب الصعيد
مباراة بين فريقى الصعايدة و الفلاحين

كابتن هريدى يحيكوا من الملعب بتاعنا احنا ، وزى ماحنا شايفين الاستاد مليان على اخره تسعين الف متفرج مش فاهمين حاجة واصل فى الكوره ، و بيتوسط المجصورة الرئيسيه المعلم عماشه ابو الضبع و حرمه اكبر تاجر شكاير اسمنت فاضيه و هو اللى هيسلم البلاص للفريج الفايز ، و زى ماحنا شايفين الفرجتين نازلين ارض الملعب يدلعوا دليع والفريج بتاعنا نازل بالزى الرسمى بتاعه وهو العمم البمبى والجلاليب البيضا المخططه لبنى بالطول و الجزم البنى المربوطة بفتله من جدام ، وبيمثل الفريج بتاعنا النهارده فى حراسة المرمى الكابتن عمار ابو خلف الله و خط الدفاع فيه الشمندى و الجماوينى و الاعرج و الدمرانى وعلى فكرة يا جماعة الدمرانى ده اصغر لعيب فى الملعب عنده اتنين وتمانين سنه و كان بيلعب مع الاشبال تحت سن سته و سبعين سنه ، خط النص من تلاته هم : قناوى و المنياوى و الجرجاوى ، اما فى الهجوم تلاته برضه هم : عسران و وهدان و معاهم نجم نجوم الفريج حمدان ابو خطوة و هو لابس الجلابية رقم متين و اربعين ياريت الكاميرا تجيبهولنا وهو بيربط حبل السروال بتاعه ، و زى ماانتو شايفين الارض بتاعتنا خرسانيه مسلحه مش نجيله زى ملاعب الخنافس يعنى اللى هايجع مش هايجوم تانى والملعب عليه اربعين غفير ببندقيه عشان يطخوا اى لاعيب يتسلل ، و الجهاز الطبى للفريقين بيتكون من اتنين داكاتره وهم الاسطى رجب حلاق الكفر و المعلم خشبه حانوتى المركز و معهم المساعد مسعود تاجر البصل و هو جايب معاه شوال بصل عشان يفوق ويصحصح اللاعيبه ، و يحكم الماتش النهارده الكابتن الكبير ابو العينين الكفيف ، و مع اول طلجه من مسدس الحكم يبتدى الماتش بهجمه سريع للفريج بتاعنا و الكرة مع حمدان و بينفرد بالجون و يجتله و يشوط الكرة فى العارضة و الحكم يضرب نار معلنا فاول على حارس المرمى و يعترض اللاعب شرقاى واللاعب قليوبى من فريج الفلاحين و يعترض معهم جمهور الفلاحين و يلقى الحكم بالطماطم و البطاطس و البيض المسلوجى و ترد الجماهير الصعايده بالقنابل و الديناميت و يولع الماتش حريجة و تيجى المطافى و الماتش يتلغى بفوز الحكم اتناشر- صفر .
و كان معكم من وسط هذه الاحداث المعلق الرياضى هريدى عبد الغفور من امام تلاجة الميه اللى فى الكشك بتاع السجاير بتاع الواد ابو العلا إبن الدمرانى بياع البطيخ .

المال و العلم والسلطة ؟

فى حياتنا اليومية كلنا بننسى نفسنا فى الجرى ورا الثلاثة , كل واحد مننا حسب شخصيته وقدراته بيختار واحد أو أكتر ويجرى وراه , وفى الحقيقة لا يربح إلا واحد وهو طالب العلم ، فهناك شخص واحد بحث فى العلم بطريقة محددة أدت لأكبر مفازة فى التاريخ .......

فالعلم هو تاج العقول و هو زينتها وهو سبب رفعة الأمم ولاكنك أثناء طلبك للعلم تجد الحياة تطالبك بالركض خلف المال لتحقيق أهداف حياتيه وقد تنسى نفسك فى هذا السباق الرهيب لجلب وتكنيز المال وتستيقظ أن سباق العلم ربما فاااااااات......

أما من واصلوا سباق المال بعد فترة يجدوا أنفسهم فى حاجة ملحة للسلطة , ربما لتكويناتهم الشخصية المتسلطة أو أملا فى الحفاظ أو مضاعفة أموالهم , وهنا تبدأ مرحلة جديدة من السباق لا يستيقظ منها إلا على سؤال الملكين فى القبر......

وهناك من يبدأ حياته الركض للسلطة , ويعتبر هذا من أصعب السباقات فى عصرنا الحالى , وعند وصوله للسلطة يبدأ جمع المال وفى الغالب هذا الشخص ينحرف أخلاقيا ، فكلنا يعلم أن من يستغل سلطاته أو منصبة لتحقيق مكسب مالى شخصى هو لص .....

عموما أنا إخترت إسم المدونة المال والعلم والسلطة وأسأل الله السلامة من الثلاثة فى غير طاعة الله عز وجل

فقد أيقنت أن العلم هو سيد الموقف وسيد العقل........... وصدق الشاعر حينما تخيل حوارا بين العقل والعلم فقال

علم العليم وعقل العاقل إختلفا ............... من منهما قد أحرز الشرف

فقال العلم أنا أدركت غايته .................. بأينا الرحمن فى كتابه إتصف

فأدرك العقل أن العلم سيده ................. وقبل العقل رأس العلم وإنصرفا

وهكذا يركض الراكضون فى سباق الحياة خلف المال والعلم والسلطة ولا يربح إلا من ركض خلف العلم بشروط

وشروط من يربح بالعلم

1- أن يكون العلم مرتبط بالله ولله ( العلم الشرعى و الدينى و حقائق الاسلام واخبار السابقين)

2- أن تقوم بتطبيق هذا العلم على نفسك وتنصح به غيرك

3- أن لا تنجرف للفتن و تدخل بما أنجزت من علم أخروى فى سباق المال و السلطة

وهنا يسألنى سائل لماذا تجنيت على العلوم الأخرى مثل الكيمياء ومثل الاحياء ومثل الفلسفة والاقتصاد والمحاسبة و علوم الطب والفيزياء وعلوم الصناعة ، وأن هذه العلوم من ضروريات الحياة للمسلمين أيضا وتؤدى لرفعة احوال المسلمين

وأجيب بكل وضوح :-إنى أقصد بمن يركض خلف العلم الشرعى ويطبقه فى حياته بأكبر الرابحين وليس هو الرابح الوحيد

لان صاحب العلم الشرعى الاسلامى الذى يطبقة سيصل فى نهاية السباق إلى جنة عرضها السماوات والارض بجوار الصديقين والشهداء

فهل تجد فى نهاية سباق الاخرين هذه النهاية العظيمة

ثانيا إن من يركض خلف علوم الفيزياء والاحياء والمحاسبة وخلافه هو فى الاساس يبحث عن المال أو يبحث عن السلطة ولو صدق فى أنه يجرى للعلم فقط ،

فالطبيب يتعلم ليعمل بعلمه ويكسب ماله

ومن يدرس علم الادراة يحاول تحسين مستوى قدراته الادارية ليصل الى اعلى المراتب والمناصب والمال ايضا

وأنا لا أقول بعدم أهمية هذه العلوم لا لا ...................... أنا بقول إن هذا الطريق وسالكيه هم أكثر المنتفعين فى نهاية السباق رغم تعبهم خلال فترة السباق......

ممكن حد يفكر إنى بقول كده لأنى دخلت سباق العلم الشرعى .........

فى الحقيقة أنا فى الخليج من 2004 و دخلت سباق المال والحمد لله ربنا وفقنى كتير جدا ونسيت نفسى وطورت نفسى فدورات فى الادارة والتسويق اللى هما مجال تخصصى بس كنت بحاول أعزز موقفى فى السباق المالى ومن فترة قريبة حسيت إنى بجرى إلى ما لا نهاية والنهاية الموت فساعتها بس فكرت وقلت أفضل الرابحين اللى جرى ورا العلم ومش أى علم ، أعلى العلوم شأنا وهو العلم بالقرأن ومعانيه ومغازيه و السيرة والسنة والعودة الى الله عز وجل .....

وإن شاء الله هدخل السباق ده من غير ما أسيب سباق الدنيا برضه ، بس من النهاردة مش هيكون المال او السلطة رقم 1

هيكون الأولوية فى السباق للعلم والعمل به عشااااااااااااااااااااااااااااااااااان الجنة

يا رب إوعدنى الجنة يا رب

وده رايى الشخصى

إسمحولى قبل أى شىء أعرفكم بنفسى

الاسم : أحمد ثروت عبد الحميد رفاعى

الشهرة : أحمد عبد الحميد
المهنة : مدير تسويق بشركة كبرى بالخليج لها عدة افرع بالكويت والسعودية ومصر وقطر
تاريخ الميلاد : 2 مارس 1981
المؤهل : بكالوريوس تجارة 2002 بالاضافة للعديد من الدورات فى مجالات التسويق والإدارة و التربية


الهدف من المدونة :-
خواطر - اشعار - موضوعات تهمنى وتهم الشباب اللى فى نفس المرحلة العمرية